Shillong, Feb 11: A•dokni dingtang dingtang sorkari officerango kamna sak 1700 na baten bangbang dongenga, uarangoni sak 547 biaprang health departmenton gnang, aro uaba East Khasi Hills, Jowai aro Turako man•chapja ine Right To Information activist Disparsingh Rani February 10 tariko aganaha.

“Water resources-o sak 183, Statics-o sak 133, Horticulture-o sak 31, Agriculture-o sak 35, Soil and water conservation-o sak 226, commerce and industry-o sak sak 113, printing and stationary-o sak 148, sports and youth affairs na sak 30, State Rural Livelihood Societyna sak 90, forestna sak 97, PWDna sak 19 aro education department-o sak 26 postrang gnang” ineba Rani press conferenco aganaha.

“Indioba bang•bata sorkarini bangbanggipa biaprangon pangkamgipa kamo rakkikugijaniara namen dukni ong•a, kamo donge sianggipani palo rakkiani ba compasionate groundko sorkari bon•ataniba namen dukni katta ong•a, indioba iako badiaba departmentrangode da•alonan ja•rikkuaenga” ine Rani agandapaha.