Tura, Sept 11: Shillong, Meghalaya-ko man·chape, 31 Assembly aro damgittam parliamentary constituency-rango election-rang aro by-election-rangko mikkangchi ong·atgniko Election Commission dontongatchengenga ine Meghalaya-ni Chief Electoral Officer Pa FR Kharkongor u·iataha.
Election-rangko aro by-pollrangko ong·atna man·gen ba man·jawa iani gimin pilak a·dokni chief secretary-rang, health aro gipin officialrangni agan-ku·pattianirangko nangnike EC kamko ka·chakataha jenan eleksinrangko ong·atani bidingo dingtang dingtang a·dokrangni u·iatanirango pangchake iako tik ka·angaha ine Pa Kharkongor parakataha.
“Da·onade, tanggitik ong·engani gimino West Bengal mangmangosan by-election-ko ong·atna gita parakatchengenga. Indake ong·oba, 31 Assembly aro parliamentary constituency-rango eleksinrangko ong·atgniko dingtang dingtang a·selrang jekai giprorogipa sabisini, chi-bana ong·ani aro ong·nasienggipa manianirang dongani gimin dontongatchenga,” ine ua talataha.
Meghalaya-ni obostako niatode, Rajabala constituency-ni dam 23 polling station-rango mikkarang jimanichi chirang dal·engkua ine aganenba, jensomoio manianirang sokbajokon re·baenggipa October jaonide chi dal·a komianggnok ine Deputy Commissioner-ni u·iataniko janape CEO aganatkuaha.
Indake ong·engon, East Khasi Hills district-o eleksin ong·atgniko dontongatchengani a·selde COVID-19 sagiparang bang·engani gimin aro tika su·giparang komiengani gimin ong·a, jenan 100% gaposa eleksinko ong·atna krabatgipa somoi ong·gen maina da·odipet West Garo Hills aro East Khasi Hills district damgnion tika su·giminrang 60% na komikuenga,” ineba Pa Kharkongor janapatjolaha.
