Tura, April 23: Garo Hills Autonomous District Council (GHADC)-o dingtang dingtang kamrangni a•sel matnanganirangko man•na nangengoba district council-ni gimagimin mikkim rasongko ra•bapilna jotton ka•gen ine Bristibar salo, gital seokako man•gipa GHADC-ni chief executive membor (CEM) Benedic R Marak, ku•rachakaniko on•angaha.
Gital CEM-ni parakatani gitade, GHADC-o tangka paisarangko jakkalsretani aro uandake batanggimin somoirango kamrangko ka•anio chu•sokgipa ong•jaha ine matnanganirangko man•ahaoba ua da•o gital MDC-rang baksa nangrime GHADC-o dingtanganiko ra•bana ja•kuko de•anggnok.
“GHADC-o ong•enggipa obostarangko an•ching pilakan nikna man•enga aro ia obostarangko nam•atpilaniara angni aro gital executive committee-ni dakna nanggnian ong•enga. Beben GHADC-o dingtanganiko ra•baani kamara altua ong•jawa indiba council-o pangkamgipa namroro silroroaniko ra•bana chinga ja•kuko de•chakataha,” ine Marak parakataha.
A•chik songsalko aro A•chikrangni daka rikaniko rakkianiara district council-ni daitoan ong•a aro A•chikrangni daka rikaniko ripinge, ia daka rikaniko a•gilsakna mesokna gita kamrangko ka•na nangenga ineba GHADC-ni gital CEM parakataha.
District Council-ni kamrangko ka•anio ua GHADC-ni membor sakanti baksa nangrime kamko ka•gen ineba Marak, ku•rachakaniko on•angaha.
