Shillong, Dec 17: Meghalaya a·doko songdongenggipa manderangni namgnina ong·gipa bang·a dingtang dingtang chanchianirango ba kamrango NPP-chi rikenggipa MDA sorkarina chakpaaniko on·na tik ka·anganiko CLP ni dilgipa Ma Ampareen Lyngdoh, Sukrobar salo parakataha.
Ua nangchongmotgipa chanchiani mamlarangara ru·uta bilsirangna kingking dabienggipa ILP, CAA baksana Khasi aro Garo ku·sikrangko Chetgipa Scheduled-o chapataniko aro gipinrangkoba man·chapa.
A·dokna namgnigipa dingtang dingtang kamo chinga, sorkarina chakpaaniko on·na taria, ine Ma Lyngdoh kobor ra·timgiparangna aganaha.
Adita salna skang a·dok damgnini gisepo sima-arina kajia-golmal gnanggipa biaprangni bidingo a·doko tom·aniko ong·atanggipani gimin aganengon, ia mamlao a·dokni skotong minister changsatai tom·e chanchirimna gita ka·dongataniko on·aha, jeon Congress dolni MLA-rangnaba ua somoion cholko on·gen ineba ua agan-talataha.
A·doko songdonggipa manderangni namgnina kamko ka·na ia gitalgipa Congress kusi ong·enga indiba a·dokni minggipin neng·nikanirango sorkarini knachakgijagipanade chinga maming daken bakrimjawa ineba Ma Ampareen parakatjolaha.
