Shillong, Aug 23: COVID-19 sajinmani gnigipa chang sokbataiani a·sel dingtang dingtang dakgipa neng·nikanirangko chagronggenchimoba, a·doko skulrangko kullipiltaiani gimin committee-na agan-ku·pattie on·anggipani bidingo a·dokni education department, Sombar salo tom·e chanchirimangaha.
Iako kobor setimgiparangna agananganio, a·dokni Education Minister Pa Lahkmen Rymbui-ni talatani gita, re·baenggipa September 1 tarikonide skulrang aro college-rangko a·doko kullipiltaina gita man·aignok ine skotong minister-chi dilenggipa committee-na uamang agan-ku·pattianiko on·na gita tik ka·angaha.
Songjinma aro songadam biap damgnio donggipa college-rangko kulliatpiltaiani gimin uamang agan-ku·pattiangaha ine janapatan baksana, songjinma aro songadam biap damgnion skulrangkoba class 9 oni 12 -ona kullipiltaina gita man·aignok ineba ua u·iatangaha.
Indake ong·oba sonjinmarango, class 6 oni 8-onade poraigiparang skultangtangona re·angnasan man·kuaigen indiba songadamrangode skulrangko chu·gimikan kullina man·aignok ine talatan baksa, songjinmarango class 1-oni 5 -onade online class-rangkon ra·angkuaigen indiba songadamrangode bi·sarang skultangtangona re·angna gita man·aignok ineba agandapataha.
Iarangni bidingo uamangni agan-ku·pattigiminrangko committee-ni ra·chakaniko education department sengkuenga ineba minister taldapataha.
Pa Rymbui, a·doko skulrangko kulliatpiltaiani gimin ku·rangko on·baenggipa saksa ong·a jean online gita skie ra·anirang maming dakeba classroom-o skie ra·a gitade ong·chongmotja ineba uni chanchiatangko parakangaha.
Janapjolna gita, COVID-19 sajinmani skanggipa chang ong·e chipakkore gita sokbaanichi re·anggipa 2020 bilsini March jaoni intalan skulrang aro college-rangko chipe donattokaha. Indake ong·engon, obostarang ka·sinangani gimin ia 2021 bilsini a·bachengo pilak skie ra·chakram biaprangko changsatai kulliatpiltaiahaoba, gnigipa chang ong·e sajinmani sokbapiltaini gimin gimikkon chipgopataona soktaipilaha.
