Shillong, March 25: Gnigipa gadango sokbataienggipa namjabegipa sajinmani giprorognina jajrengsona nanganiko ong·atengon, a·doko ru·utgijan maniangna am·engipa Holi kal·ani somoiona Meghalaya sorkari, Bristibar salo gital ge·etanirangko on·angtaiaha.
Gital niamrangko tarigimin Standard operating procedure (SOP)ko sorkarini u·iatangni gitade, Holi manianirangko mande jinmao dakna ba manina man·jawa.
Meghalaya-na agreba, a·songni bang·a gipin songjinmarango jekai — Mumbai aro Delhi — iarang gimikoba mande jinmao Holi manianirangko raken beng·e donaha.
“2021, March 25 tariko Meghalaya sorkarini Home (Political) Department-ni Holi kal·aniko manignigipana daksogimin SOP-ko u·iatani,” ine Department of Information and Public Relations, Bristibar salo Twitter-o segatataha.
“Bilsi 65 batgipa ja·delgiminrang, be·enno mingsana bate saa donggiparang, oko kegipa ma·giparang aro bilsi 10 na komigipa chonchongipa bi·sarang gimikkon noktangtangon dongtokchina ge·etaniko on·a. Manianio bakko ra·gipa mande sakantian mande bang·gipa biaprango komibeoba feet-bonga chel·tange dongna nanggen, jakrangko namedake rongtale jaksuani, saksa-sakgipinoni chel·anggrike dongani aro mikkangko pindapani mask-rangko jakkalna nangtelgen,” ine ge·etanirangko on·anggipao janapataha.
Meghalaya-oniko mija Mongolbar salo COVID-19 sabisiko man·ani minggni gital mamlarangko segatangtaiaha, jechin a·dok gimiko ia namjabegipa sajinmako man·a gimikara sak 14,017 mang gapaha. Indake ong·engon, sabisioni nampilkugijagiparang da·o sak 25 mang dongenga aro sabisini a·sel a·doko sianggiparang gimik sak 149 mang gapangaha.
