Shillong, April 21: Meghalaya a·doko koela bikotaniko champengatgimin ge·etaniko pe·e niam gri koela salanirangko nambate nirikkiate kamrangko ka·na man·na gita Central Armed Police Force (CAPF) sipai dolko donatna gita mongsonggipa biaprangko sandiatenga ine Justice B. P Katakey, Sukrobar salo parakangaha.
Iani bidingo u·iatangengon, batanggimin salo High court, niam gri koela salanirangko nirokna gita sipai dolrangko watatchina agan-ku·pattianiko on·angaha aro iana April 27 tarikko somoi on·ataha, indiba, India sorkari, ma·mongni sipai dolko company ge·chikking watatskaenga ine ka·dongsona gita man·enga ine Justice B.P. Katakey, parakatenba, a·doko niam gri koela bikote salsrukanirangko nirokatna manchaan sipairangko donna mongsonggipa biaprangko sandiatenga ine janapataha.
Indake ong·engon, a·doko niam gri koela salanirangko rim·na aro champengna gita a·dok sorkarini ja·kurangko de·atanirango Supreme Court aro NGT-ni ge·etanirangko ja·rikata ba ja·rikjaenganiko nirokatchina gita Meghalaya High Court, batanggimin salo, Gauhati High Court-ni gitcham Judge, B. P Katakey-ko songangaha ine nikatna gita man·gen.
