Shillong, April 17: A·doko Roster system-ko ra·gatani bidingo ia antion a·dok sokarini gita tom·e chanchirimgen ine a·dokni skotong minister Pa Conrad K Sangma, Sombaro parakataha.
“Sorkarini gita chinga ia antion tom·e chanchirimgen, indiba dingtang dingtang nanganirangko nigrike kam ka·anio aro chu·gimik talatanirangko dakanio somoirangkode nangaigen ine Pa Sangma, kobor ra·timgiprangna aganangengon, sorkarini gita chanchiani ja·man political dolrang aro dingtang dingtang dolrang baksaba tom·e chanchirimaniko dakgen aro iako sakanti baksa agangrikani ja· manosa mikkangchi maidakgipa ja·kurangko de·gen inani gimin chinga kamko ka·anggen ineba skotong minister parakataha.
Ian a·doko songdonggipa jatgittamni man·gnini mamlasa ong·enga ine janapatengon, Pa Sangma, iano nangchapgipa pilakni gimin jekai kacharini hukum aro dingtang dingtang neng·nikanirangko nigrikesa jedakgipa kamkoba ka·chakatna gita nanggen, iani ja·manosa bak man·gipa dingtang dingtang dolrangko okame chanchirimtaiesa darangni namgnini gimin chinga tik ka·aniko dakgen ine agandapataha.
