Shillong, Feb 9: Khasi-rangoni skanggipa Mixed Martial Arts (MMA)-o su·griksusagipa Raymond Johnny Kurbah, mikkangchi rakbatgipa Ultimate Fighting Championship (UFC)-o su·griksusana cholko man·na gita, Dubai ba Thailand a·songo jagittamna training-ko ra·na US a·songoni ge·sa agency aro Los Angeles-oni Upgrade MG baksa soi ka·grikaha.
Kurbah, iani bidingo Bristibar salo koborna agananganio, a·gilsak gimiko dal·batsranggipa biap UFC-o su·griksusana gita seokako man·na skang ua, changbri ba changgittam dakgrikna gita nangenga.
Indake ong·engon, Kurbah-ni dakgrikgnirango nanga gita training-rangko on·sona US-oni ge·sa agency-na tikkako on·e bilsi-gimikna ua soi ka·grikangaha.
Upgrade MG-ni mande Vikram Raja minggipani u·iatani gitade, Raymond-ni changa-sapani kri una training-rangko on·gen, jeon ground aro pound technique-rangna ua, Dubai-o skie ra·aniko dakna nanggen, uandake, striking technique-rangna ua Thailand a·songo skie ra·anirangko dakna gita nangskagen.
Karate-o black belt man·gipa Kurbah, jean da·o MMA-o bantamweight division-ni ning·o su·griksusaengachim, a·songgipinchi training-rangko ra·na gita lak 2-na komigija tangka-paisarangko nangengani gimin a·doktangni manderangni dakchakaniko nangnike mol·molaniko dakangaha.
