New Delhi, Sept 5: A·gilsako dilgiparangni kamko tosusae nigipa US a·songni ‘Morning Consult’-ni gita survey-ko ka·anio September-ni 2 tarikona kingking, India a·songni Prime Minister Narendra Modi-ni ‘approval rating’, a·gilsakni sak 13 dilgiparangni gisepo batenga ine nikna man·aha.
Political Intelligence gita Morning Consult-ni data-ko chimonganio, August-ni 31 tarikona US a·songni President Joe Biden aro German Chancellor Angela Merkel-ko man·chape gipin dilgiparangna bate Modi-ni kamna point-ko on·ani 70 percent-ona tang·doangaha ine mesokaha.
India a·songo gnigipa changna COVID-19-ni giproroengmiting somoirango Modi-ni rating tang·onangahaoba adita jarangni ja·man uni kamna point-ko on·ani tang·doangskaaha.
May jao Modi-ni ‘approval rating’ 63 percent-ona tang·onangahachim aro uandaken 2019 bilsini August ja intal Political Intelligence-ni hisapko rakkianio komibatsranggipa ong·ahachim.
Antiprako survey-ko ka·ani gitade, Modi-ni ‘disapproval ratings’-ba September-ni 2 tariko 25 percent-ona tang·onangaha.
Ia survey-ko ka·anio sak 2,126 ja·delgimin manderangko online gita interview-rangkoba ka·ahachim.
Modi-ni net approval rating (45), US a·songni President Joe Biden (4), German Chancellor Angela Merkel (11), Canada a·songni Prime Minister Justin Trudeau (-5), France a·songni President Emmanuel Macron (-23), UK a·songni Prime Minister Boris Johnson (-11) aro Brazil a·songni President jair Bolsonaro (-15)-ko man·chape gimik sak 13 dilgiparangni gisepo bang·batgipa ong·aha.
