Jowai, Oct 27: Samtangtangko rongtalatan baksa knal-ambinsalna nambate re·mikkangani’ ine chanchirimani ja·pangko done, daito gnanggipa ong·e samtangtangna naljokaniko on·an baksa a·ningni gamko simsake bikotani bidingo manderangna ma·siate on·na gita, Meghalaya-ni Forest Environment Department, MSPCB aro Geological Survey of India-ni dakchakanichi Meghalaya sorkarini Directorate of Mineral Resources, Butbar salo Jaintia Hills a·jani Shangpung Mission, Rev. Anthony Crockett Memorial Hall-o awareness programko ong·ataha.
Programko, DMR-ni Assistant Geologist, Stephan Lamo-chi dakdilaha jeon rimchaksoani kattarangko FA Warjri aganangskaaha.
Tom·aona mongsonggipa sokgipa West Jaintia Hills a·jani ADC, Ma DD Syngngai-ni jinmana aganprakanganio, an·ching jensomoio a·ningni gamrangko bikotengon an·chingni samtangtangna naljokanirangko on·ani gimin chanchie a·ningni gamrangko simsake bikotna gita nanga ine parakangaha.
Programo mongsong agangiprangara, Geological Survey of India-ni Dr. B Mawthoh, Forest and Environment-ni ACF, DN War, District Mining Officer, Pa M. Syrti aro MSPCB-ni Asst Environment Engineer, Pa MS Tiewsoh-maang ong·a jeon uamang programni miksongani gimin aganangtokaha.
Ia programo, Shangpung-oni dingtang dingtang skulrangni chatro-chatrirang aro Shangpung-ni Waheh Chnong ba nokmaba dongpae bak ra·angaha.
