Shillong, April 27: Meghalaya a·dokni skotong Minister aro NPP dolni Padot Pa Conrad K Sangma, U Soso Tham-o National Peoples Youth Front (NPYF)-ni tom·anio a·dokko aro a·songko rikanio chadamberangni jak dongpaani nangchongmotani bidingo aganangaha. Chadamberangni sason ka·anio jak on·paaniara political dolni namgninasan ong·aija indiba ian a·songko rikanio mongsongbatgipan ong·a ine Pa Sangma aganaha
Purno Sangma sagini gisik seng·e kam ka·anganiko tom·anio gisik ra·atengon, sakantian maiba miksonganina daariengon, miksongani ketket ong·na nanga. Chadambe ong·engmitingon miksongani gnang kam ka·osa chu·sokna man·a. Chadamberangna ding·chaotani kattarangko Pa Sangma aganengon, badiaba political dolkomangmangko ra·dona miksonge kam ka·aigija mongsongbate jat aro songsalkosa mikkango done re·mikkangna nanga ineba Skotong Minister tom·anio aganaha.
Warachakgipa dolrangni Assam Meghalaya Simarini golmalko ra·e togi cha·bokgipa ine dosi on·e agananina, chinga togi-cha·bokgipa ong·genchimode bang·a manderang uamangni dolko wate NPP dolonan napbajawachim aro unbaksa kakketko aganode sima arini map wa·rengko Dr Mukul Sangma-ni somoio chongmotan 2011 bilsio salgimino pangchake soi ka·grikaha. Watchangbaa man·gipa songrang uamangni chasongo ua jolni manderang baksa maming agan golpogrika gri sima ari salani a·selsa da·alo ia obosta ong·enga unigimin iano angni jak dongja ine Sangma aganaha.
Sima arini golmalko bilsi 50-na skangonin namatna man·chipgija dongenggipako manderangni ku·mongani aro bil on·anichisa da·alo bimang pil·atna man·aha ineba Pa Sangma taldapataha.
KHADC-ni kachariona ra·angna mangsongani bidingo sing·on, ia sima arini bidingo kachariona ra·ange bichalko am·gipa manderang NPP dolni MDC-rangde jak dongja aro jemangan iano jak on·engachim uamang baksaba katta meligrikgiminsachim indiba da·alo obostako nigrike politics kal·asan ga·akaienga ine Skotong Minister aganaha.
Pa Conrad Sangma re·baenggipa 2023 bilsini electiono South Tura constituency-o ama cha·gnok ine AITC doloni agananina, Election-o cheani aro chegijani alturiri agana amgipa ong·ja. Unigimin ama cha·jana gita anga rakbate kam ka·gen ine Pa Conrad K Sangma kobor-na aganaha.
