New Delhi, March 25: Visakhapatnam Steel Plant (VSP) aro game cha·giparangni niamrangko sorkarichi ong·gija private-chi chalaina pakwate on·angna gita ma·mong sorkarini tik ka·engani gimin iarangko jegalenba da·o skotong songjinmao jingjengatenggipa farmers union baksa bakrimgipa Samyukta Kisan Morcha (SKM), Sukrobar pring 6 bajioni attam 6 bajiona kingking Bharat bandh, chong·motan India a·song gimikon champengataniko dakangna gita manchisoaha.
Ma·mongni ra·bagipa minggittam gital niamrangko ra·chakna man·jae jegalgrimenba a·songni game-ge·e cha·giparang da·o chu·gimik ja-brimang gapnakpile Delhi-ni sima-ari jolrango jingjengattokenga.
Champengatnakengani bidingo koborko man·soani gitade, champengatani somoio a·song g gimikchin pilak ramarang aro rel ramarang, anti-bajar cha·ram biaprang aro mande bang·gipa gipin biaprangkoba chiptokgen. Bharat Bandh-ko chu·sokgipa ong·atna aro ‘Annadata’ ba a·songna cha·aniko on·enggipa game-ge·e cha·giparangna chu·gimik chakpaaniko mesokani gita union, a·songni mande sakantikon ia champengataniko manitokchinaba mol·molatjolaha.
A·songni game-ge·e cha·giparangna ma·mongni ra·bagipa minggittam gital niamrangko ra·galchina aro game man·gipa biterangko palna-sim·na gita tik ka·gimin komibegipa dam ba minimum support price (MSP)-na niam gita ka·dongataniko on·china dabieming da·o chu·gimik ja-brimang gapna am·pile hajalni hajal a·songni game-ge·e cha·giparang, mongsongbate Punjab, Haryana, aro saliram Uttar Pradesh-ni game cha·giparang da·omiting Delhi sima-arini mongsonggipa biaprang Singhu, Tikri, aro Ghazipur jolrango a·tiprangko dakjolenba jingjengattokenga.
Game-ge·e cha·gipa dolni dilgipa saksa, Buta Singh Burjgill-ni adita salrangna skang agananggipao, ia ja March 26 tariko chong·motan jensomoio ia minggittam gital niamrangni kosako jabri gape jegale jingjengataniko matchotatani salo uamang chu·gimik ong·en Bharat bandh-ko India a·song gimikchin dakanggen ine agan-parakangaha.
Unbaksana, re·baenggipa March 28 tariko “Holika Dahan” ni somoio game-ge·e cha·giparangna tarigipa gital niamrangko chappa ka·giminrangkoba uamang so·e galjolgen ineba game cha·gipa dolni dilgiparang aganangkuaha.