Shillong, Feb 22: Re·baenggipa Sukrobar salo, a·dokni skotong Shillong songjinmao BJP dolni roadshow-ko ong·atenggipao a·songni Prime Minister Pa Narendra Modi bakko ra·angnasienga.
Iani bidingo koborna aganangengon, Meghalaya BJP-ni padot Pa Ernest Mawrie, skanggipa changna a·dokni skotong songjinmao roadshow-ko ong·atnasienggipao Prime Minister bakko ra·anggen ine u·iatenba, PM Modi, pringchibara Upper Shillong Helipad-o onchongeani ja·man Jhalupara point-ona re·bagen, uni ja·man a·dokni jakgitelanina dakgrikdilgipa U Tirot Sing-ko pul bibalrangchi mande ra·aniko dakna gita joljol State Central Library-ona re·anggen. Iani ja·man, Khyndai Lad (Police Bazar) -o tom·daknasienggipa programo bak ra·na gita re·angskagen ine parakataha.
Salni bakna dingtang dingtang programko donsoengon, manderangna maming neng·nikaniko on·gijanagipa somoiko manchie donaha uan pring 11 bajoni 1 ata bajiona ong·gen, jedakode office-chi re·giparangna aro mongsongbate skul bi·sarangna uni re·baanichi maming neng·nikanirang dongjawa ineba Pa Mawrie u·iataha.
Unomiting, dolni padot baksana Pynthorumkhrah-ni BJP-ni candidate Pa AL Hek-ba kobor ra·timgiparangna aganangpaengon, skul aro college-chi re·giparangna maming dakeba neng·nikaniko on·jachina gita Prime Minister an·tangan aganataha…ian an·chingni Prime Minister-ni, manderangna aro jinmana chanchichake dakani kam ong·a ine Pa AL Hek janapataha.
Indake ong·engon, re·anggipa bilsini December 18 tariko Prime Minister Pa Narendra Modi-ni Shillong-ona re·baani somoio, skotong songjinmani bang·bata ramarangon ‘No-entry’ -ni chinrangko nikna man·a baksana, gari-gorarangni sket-changket dake adita kilometer-rangna ka·sinsin malamanirangko nikna gita man·ahani gimin, Pa Mawrie, da·anpakde skango gita ong·taijawaha, maina chinga district administration-ko gronge iani bidingo namedaken agangrikaniko dakaha, jenan gimikkode ong·gija, mitam nangchongmotgipa ramarangkosan adita somoina district administration champengna gita nanggen ine a·dokni BJP-ni padot u·iatangkuaha.
Jinma tom·dakna gita maini gimin Police Bazar-ko baseskaaha ine sing·on, Ian BJP-ni pilak candidate-rangna jatchigrik biap ong·a ine aganchakange, indioba, ia biapo Prime Minister-ni programko ong·atanichi salanti re·ruraenggiparangna maming dakeba neng·nikaniko ra·bajana gita dolni dilgiparangni ka·dongataniko on·enganikoba Pa Mawrie u·iatangjolaha.
