Shillong, May 8: So·so-jengjeng aro golmal ong·anggipa Manipur a·doko jachange dongrikgipa a·dokni bangki chatro dolrangba biaptangona name sokbatokaha ine Meghalaya-ni skotong minister Pa Conrad K Sangma, Sombar salo u·iatangaha.

Uamangko rimongkatbana gita, Shillong-oni Imphal-ona joljol bilange bilbapilna gita Sombar salo sildorengko tik ka·e watataha ineba ua u·iatangaha.

Indake ong·engon, batanggimin salgittamni gisepo, sak 300 mangni gita Manipur-chi poraidapna re·anggipa a·dokoni chatro-chatrirangko biaptangona rimbapiltokaha aro uamangni re·baani chu·gimik korosrangkon a·dok sorkari gamataha.

Jachange donggiparangko rimongkatbaani skanggipa salode, Charter flight bolsakoba ma·mong sorkari watata dongjani gimin technicalni gita bang·a neng·nikanirangko man·ahachim, indake ong·oba, a·dok sorkari cholrangko sandie uarangko ja·mano namatna gita man·aha.

Dingtang dingtang obostarangni a·sel saksa ba sakgni dongrikgipana agrede, Sombar salo 99 percent-ni gita chatro-chatrirangan a·doktangona name sokbapiltokaha ineba skotong minister u·iatjolaha.