Guwahati, June 14: Guwahati songjinmani Boragao sepango donggipa Nizarpur minggipa biapo a•a rurongdape mande sakbri Mongolbar pringo siangaha. Sianggipa manderangara ua jolo songdonggiparang ong•achim. Gonta 24 na jimbee mikka waani a•selo a•arang nom•e, uamangni dongchakenggipako rurongdapaha aro uamang biapon sikamaha. Sigimin manggisirangkokoba un pringon man•aha. Da•ororo mikka jimbee waanichi Guwahatini bang•a rel ramarang, rama-sorokrang chi bana ong•tokaha.
Indian metrorological Department, salgnina Assam aro Meghalaya jolo mikka jimbee wagnikoba u•istsoe mikrakatanikoba u•iataha. Maiba neng•nikanirang dongode naljokkalgipa biaprangona jite dongchina aro District administrationa 1077/86371 12297 ona phone ka•e u•iatna man•gen ineba u•iataha.
