Shillong, June 22: Bang·bata changon AAY merongko sualna bimingrangko segatanio uni constituency-ni cholgri manderangkode watchangronga ine West Shillong constituency-ni MLA Mohendro Rapsang, suk ong·gijaniko parakatenba, merongko sualna gita bimingko seanio pilak cholgri manderangkon segatchina gita sorkariko didiangaha.
Rapsang-ni parakatani gitade, iani bidingo ua Mongolbar salo an·tangni constituency-ni gittamko dilgiparang baksa tom·e chanchirimangaha, jeon supply office-ni official saksaba dongpae, ia AAY merongko man·na gita biming segatna dongimin niamrangko ja·mano uamangna on·atgen ine parakangaha.
Indake ong·engon, West Shillong constituency-ni ning·o bang·a nokdangrangan ration card-rang donggijagipa nokdangrangsa ong·ani gimin ia merongko sualna biming segatanio bang·bata nokdangrangan watchanggalako man·tainaba gnang ine Rapsang, an·tangni suk ong·gijaniko parakatenba, ja·mano uamang Supply office-ni watatgipa niamrangko nipiltaie an·tangni constituency-ni manderang baksa iani bidingo chanchirimtaigen ine parakataha.
Iani bidingo ma·mong sorkari baksa agangrike, a·doko cholgri ong·gipa manderangna ia merongko tikatchina gitaba ua a·dok sorkariko didiangaha.
