37.2 C
Tura

A•chik chadamberang nambate chu•sokna tikkelgiparang ong•na nangenga: Education Minister

Must read

Williamnagar, May 23: Lekka poranio A•chikrang namen ja•manchakengani gimin namgipa result-rangko man•na gita A•chik chadamberangko rakbate poraichina a•dokni Education Minister Rakkam A Sangma didiangaha.

Mongolbar salo, East Garo Hills a•jani Loyola College-o graduate ong•anggipa chatro chatrirangna ‘Farewell Ceremony’-ko ong•atanio a•dokni Education Minister-ba bakko ra•e, A•chik chadamberangna didiani kattarangko aganangaha.

Loyola College-ni mikkim rasongko ra•doangkuchina gita college-ni chatro chatrirangko didiangengon, pangnan kakketgiparang ong•china, Isolna an•tangtangko on•kangchina aro sakgipinrangna dangdike on•na skani dongchina gita Sangma didiangaha.

An•tangtangko on•kange kam ka•engani gimin college-ni skigiparangko aro gipin kam ka•giparangko mittelpilangskaengon, uamangni on•kange kamko ka•anichi ia college, lekka porani gadangko ra•dona man•aha aro Garo Hills-o ia college-ko niksengbatgipa college-rangoni damsa ong•ataha ine Education Minister parakataha.

Ia tom•anio dingtangmancha department ge•antioni nambatgipa chatro chatrirangnaba Education Minister-ni jakchi boksisrangko on•angaha aro ia chatro chatrirangara, Commerce department-oni Anjuli S Marak, English-oni Tenmarchy M Sangma, Political Science-oni Necky Westha N Sangma, Education-oni Susie Susanti C Sangma, History-oni Giftsina M Sangma, Economics-oni Cheame S Momin aro Garo department-oni Tintin M Marak ong•a.

Ia tom•anio Loyola College-ni principal Fr Sunny Augustine-ba jinmana aganprakengon, graduate ong•anggipa chatro chatrirangna an•tangni namgipa skaniko on•angenba, janggi tanga gimikan skie ra•giparang ong•e jatna aro a•songna dangdike on•giparang ong•angchina chatro chatrirangko didiangaha.

More articles

LEAVE A REPLY

Please enter your comment!
Please enter your name here

Latest article