Tura, March 1: Assembly election-na campaign ka•ani somoi bon•ani ja•man, Dalu constituency-ni ning•o donggipa songrangona re•ange manderangna tangka paisarangko sualna jotton ka•ani gimin rim•ako man•ani ja•manoba, an•tangko rim•gittange kragija dake doke sate roaha ine social media-rango matnangahani gimin Association for Democracy & Empowerment (ADE)-ni president Dalseng Bira Ch Momin-ni kosako Doldenggagre songni manderang, Dalu police station-ni officer-in-charge-o FIR ka•doangaha.
FIR-o janapani gitade, re•anggipa February 25 tarik walo ADE-ni president Dalseng Bira Momin, an•tangni manderang baksa Doldenggagre song gita re•angengmiting somoio songko nirokenggipa manderang, uamangko champengsoe sing•on, uamang Duripara songona re•angenga ine aganaha indiba ja•mano Dalseng aro sakgipin mandede Doldenggagre dam sambaon garioni ong•onrikaha aro uamangni re•baenggipa garide Ruga A•king Nokmani Rubber bagan-onasa re•angskaahachim.
Doldenggagre dam-o ong•onrikani ja•man Dalseng aro unbaksa re•bagipa mande, Nokmani mi a•pal jangchi gita Baptist gilja nok ramaona re•sotangengachim indiba songni manderang uamangni sriksrik re•angengako niksoe sing•aton, uamang mamingkoba aganchakgija ua biaponi kataha indiba ja•mano Dalseng-kode Nokmani fencing kagipao ja•a bajie dongako rim•na man•aha. Unbaksa re•anggipa sakgipin mandekoba songni manderang, gitcham Nokmani gopramoniko rim•ena man•aha ine songni manderang FIR-o parakaha.
ADE-ni president aro sakgipin mandeko rim•ako ma•sijae, Bolero gario dolgipin manderangba ua rama gitan re•baengachim aro uamangko songni manderang sing•on, uamangba Duripara songona re•angenga ine aganahani gimin songni manderang bebera•jae uamangko re•na watjaha. Ia manderang gari sale katna jotton ka•o man•jae ja•mano garioni ong•one katengachim indiba ia manderangko Masangpani skul waiting shed-oniko rim•na man•aha ine songni manderang parakataha.
Ia manderangara Jepal M Marak aro Dikkan Marak ong•achim aro ia manderangara BJP-na kamko ka•enggiparang ong•achim ineba Doldenggagre songni manderang FIR-o parakataha.
