Shillong, March 17: Meghalaya a•dokni adhoc skulrango skigiparangni dormahako bariatani bidingo a•dok sorkari da•o dipet cholrangko niengkua ine Budbar salo, a•dokni Education Minister Lahkmen Rymbui talatangenba, da•o dipet adhoc skulrango skigiparangna dormahako on•anio bilsio gong kror 181-ko sorkari koros ka•na nangenga ine parakataha.
Assembly-o Mawphlang-ni MLA SK Sunn-ni sing•anina aganchakaniko on•angengon, adhoc skulrango skigiparangni dormaharangko bariatna gita da•o dipet sorkari cholrangko niengkua ine Rymbui parakataha.
“Da•o dipet LP aro UP adhoc skulrango skigiparangna dormahako on•anion chinga bilsio gong kror 181-ko koros ka•na nangenga aro skigiparangni dabiani gita aro MLA-ni ku•rang on•na gita chinga uamangnaba sorkarini skigiparang baksa apsan kam aro apsan dormahako on•genchimode gong kror 251-na baten tangka paisarangko nangdapkugen,” ine Education Minister parakataha.
Ia korosrangko chu•sokataniara sorkarina altua kam ong•ja ine talatangengon, tangka paisarang chu•onga gita donggenchimode skigiparangna dormaharangko nanga gita on•anian sorkarini daito ong•gen ine Rymbui parakataha.
Meghalaya a•dokni dam 2450 LP adhoc skulrango sak 1225 skigiparang, dam 3376 UP adhoc skulrango sak 844 skigiparang aro dam 2139 secondary skulrango gimik sak 386 skigiparang donga ine u•iataha.
