Shillong, May 12: Meghalaya a•dokni adhoc skulrango skigiparangna dormaharangko bariatchina dabie skigiparang jingjengatanirangko dakengon, skigiparangni dormahako bariatchina on•atgipa proposal-ni file-ko da•o dingtang dingtang department-rango niengkua aro ia file uona sokbaahaon, skigiparangni dormahako bariatani bidingo a•dokni Cabinet tom•e chanchirimanggen ine Bristibar salo, a•dokni Chief Minister Conrad K Sangma parakataha.

Chief Minister-ni parakatani gitade, Education department-ni official-rangba adhoc skigiparangko gronge agangrikmanaha aro skigiparangna dormaharangko bariatani bidingo an•tangtangni nangnikanirangkoba skigiparangna u•iatmanaha.

Adhoc skulrango skigiparangna dormahako gong 18,000-chi bariatchina aro bilsiprakon 5 percent ka•e bariatchina gita Federation of All School Teachers of Meghalaya (FASTOM), sorkario dabiengachim ine nikna man•a.