Shillong, Mar 31: Bristibar salo Meghalaya Cabinet tom·e chanchirimangenba, adita niamrangko ra·chakangaha.
Meghalaya a·doko a·ningni bosturangko bikotani a·sel samtangtango donggipa buring bolgrimrang aro chiring chibisikrang nosto ka·ako man·ahani gimin, iarangko tangatpiltaina gita Meghalaya High Court-ni ge·etanio pangchake Reclamation Fund-ko 2014 bilsio a·bachengataha aro uandaken Bristibar salo a·dokni Cabinet, Meghalaya Minor Minerals Reclamation Fund Management Guidelines 2022-ko ra·chakangaha.
2018, 2019, 2020 aro 2021 bilsirango jakkalgipa GST Rules-ko taridapgimin ra·chakaniko aro mikkangchi GST Council-ni recommendation-o pangchake GST-ni niamrangko taridapanikoba Bristibar salo Meghalaya Cabinet ra·chakangaha.
PA Sangma Fellowship for Legal & Policy Research Training-na Bengaluru-ni National Law School of India University (NLSIU) baksa bakrimna bi·anikoba ia apsan salon a·dokni Cabinet ra·chakangaha. Research-rangko dakenggipa NLSIU-ni chatro chatrirangna dingtangmancha NLSIU baksa bakrime ‘PA Sangma Fellowship for Legal & Policy Research’-ko a·doko a·bachengatgen.
Shillong-o donggipa Sainik Welfare-ni Director Col. Gautam Kumar Rai (Retd)-ni kamko bilsi gittamchi ra·dodapatna gitaba ia apsan salon a·dokni Cabinet ra·chakangaha.
Bon·kame, Col. M Sushaphir Singh (Retd)-ko bilsi gittamna Tura-ni Zila Sainik Welfare Officer ong·e donangkuna gitaba Cabinet ra·chakangaha.
