Shillong, Sep 14: Assam aro Meghalaya a•dokni simarango meligrikna man•jaenggipa biaprangoni skanggipa bakko namatna kam ka•anio a•dok sorkari, chang 28 tom•anirangko, chang 18 field visit ba songrangona re•e nianiko aro salantian changbrimangna tom•anirangko ong•ataha ine Budbar salo, Meghalaya a•dokni Chief Minister Conrad K Sangma, Assembly-na parakataha.
Assam sorkari baksa soi ka•grikgipa MoU-ko Meghalaya sorkari nipiltaienba Assam-na on•atgimin mitam songrangko man•bapilna jotton ka•genma ine Nongpoh-ni MLA Mayralborn Syiem-ni sing•anina aganchakaniko on•angengon, a•dok damgnini soi ka•grikgimin MoU-ko nipiltaina nangani katta dongjaha aro meligrikna man•jaenggipa bang•bata songrangkon Meghalaya a•dokona man•baaha ine Chief Minister, talataniko on•angaha.
Je songrangan Assam-o napangahachim ia songrangba, ia songrango songdongenggipa manderangni nangnikani gitasa ong•aha ineba ua aganaha.
‘Watchanggalako man•gipa songrang’ ine MLA-ni agangipa kattarangni gimin janapangengon, ian name chanchirimna nangenggipa kam ong•enga maina ia songrangara, a•dok damgnini gisepo meligrikna man•jaenggipa biaprangoni bak ong•jagenchimode aro Assam a•dokni ning•osa ong•e 2011 bilsio salgipa wa•reng gita ong•jagenchimode ia songrangko ‘watchanggala’ ine aganna man•jawa ine Sangma parakataha.
Skanggipa bakni kamrangko regional committee-ni recommend ka•anio ba ku•pattianirango pangchakesa a•dok damgni soi ka•grikaha ineba Chief Minister parakataha.
Da•o gnigipa bakko, 2011 bilsio Meghalaya sorkarini Assam on•gipa report-ni gita ong•gija kamrangko ka•skana man•genma ine Nongpoh MLA sing•taion, ian altua kam ong•jawa ine Sangma parakataha.
