Agartala, Nov 15: A·doko tom·tomaniko golmal ka·na kakket ong·gijagipa aro banaidapgipa kattarangko gipatanina baditaba changrangna apoti ka·anirangko man·ani gimin Tripura police, mija Robibar salo kobor setimgipa sakgni me·chikrang Sammriddhi Sakunia aro Swarna Jha-maangko rim·aha ine koboro parakataha.
Sakunia, an·tangni aroba sakgipin kobor setimgipani kosako FIR ka·anggipani kinggipin lekkako an·tangni Twitter-o see parakataha.
FIR-ni gitade, uamang sakgnini kosako Indian Penal Code-ni Sections 120(B), 152(A), aro 504-o pangchake Fatikroy Police Station-o mamlako segatangahachim.
Uamang sakgnini kosako FIR ka·dogipa Vishwa Hindu Parishad-ni saksa dilgipa Kanchan Das-ni matnangani gitade, uamang sakgni Fatikroy Police Station-ni ning·ogipa Paul Bazar-ona re·ange Muslim jatrangni dongenggipa biaponi adita te nokrango napenba Tripura sorkari aroba Hindu jatrangni kosako adita ding·chaogrikatani kattarangko aganbatokahachim.
Batanggimin somoio Paul Bazar-o Muslim jatni olakkichakram biap mosque-ko nosto ka·anina VHP aro Bajrang Dal-ni kosakoba Sakunia, tol·e matnangani kattarangko manderangna gipataha aro uamangni daka kamara maiba ong·gijana miksongani bak ong·a aro a·jao songdongenggipa jatsa-jatgipinni kosako golmalko ong·katatna jotton ka·aniba ong·a ine Das matnangkuaha.
Indake ong·engon, kobor setimgipa ua sakgni me·chikrangni kosako FIR-ko segatani gimin Foundation of Media Professionals (FMP), Tripura police-ni kosako raken jegalangtokskaaha.
