Itanagar, Oct 19: A•doko kejur to ge•aniko Mongolbar salo, Meghalaya a•dokni Forest & Environment Minister James K Sangma jegalatenba, a•doko kejur toko ge•aniara janggi gnanggiparangnasan ong•aigija samtangtango ong•telaigiparangnaba nangchakeani donggen ine parakataha.‘Regional Aspirations, National Outlook’ ine pangchakaniko done NPP-ni tom•bimonganiko Itanagar-o ong•atanio James Sangma, jinmana aganprakengon, ma•mong sorkarini kejur toko ge•na manchienggipani bidingo chanchirimangenba, a•doko kejur toko ge•aniara a•dokni buring bolgrimrangko nisie galani gita ong•gen ine parakataha.

“India a•songona kejur toko Indonesia a•songonikosa ra•baenga aro an•ching cha•ani tona bang•bea tangka paisarangko koros ka•enga. Indiba kejur toko an•chingni jolrango ge•genchimode ian an•ching samtangtango ong•telaigiparangna nangchakeaniko ra•bagen. Indonesia aro Malaysia a•songrangoba kejur toko ge•ani a•sel bak 100-oni bak 25-mangni gita buring bolgrimrang nisigalako man•aha. Uni giminsa an•chingni jolrango iako a•bachengatode an•chingni samtangtango ong•telaigiparangnaba kenchakna nangani ong•enga,” ine Sangma parakataha.

Ia tom•bimonganio ua salgro salaram a•dokrango bobil dake chakatani aro Assam-Arunachal a•dokko man•chape Assam-Meghalaya a•dokni simarango meligrikna man•jaenggipa obostarangni giminba chanchirimdilangaha aro maikai ia neng•nikanirangko NPP namatna kam ka•engachim, uarangni giminba janapjolangaha.