Shillong, April 26: Dingtang dingtang biaprangoni Meghalaya a•dokona re•bapilenggipa manderangko komibeoba sal 7-na dingtang napate donna gita Sombar salo Meghalaya sorkari tik ka•angaha. A•dokona re•bapilenggipa manderang COVID-ni chinrang donggenchimode, uamang sal 7-na dingtang nape dongdapangkuna nanggen.
Sombar salo COVID-ni obostarangko nipilna gita tanggitik tom•ani ja•mano kobor ra•timgiparangna u•iatengon, a•doko Coronavirus-ko man•giparang ta•raken batroroenga indiba sorkari, da•o dipet a•doko lockdown-ko ra•gatgija nanga gita champengatanirangko dakangkuaigen ine Chief Minister Conrad K Sangma parakataha.
Meghalaya a•dokona re•baenggipa manderang pilakan, entry point-rango RT-PCR-chi porikka ra•telna nanggnok ineba Chief Minister parakataha.
UNDP-ni dakchakanichi a•doko oxygen tarigipa damdok karkanarangko kuligen ineba Chief Minister parakataha.
Nangchongmotana agre noktangtangoni ong•katjachina gitaba ua manderangko didiataha.
