Kohima, Dec 17: Ning·joljol kobor on·sretako man·anio pangchake re·anggipa antio bobil dolni kosako operation-ko ong·ato songoni ramram manderangko sipai dolrangni gosretaniko jegale jingjengatanirang da·o baten bilakroroha, jeon Nagaland a·dokni skotong Kohima-o Armed Forces (Special Powers) Act (AFSPA)ko ra·galchina gita Naga Student’s Federation (NSF), Sukrobar salo dal·batsranggipa rally-ko ong·atangaha.Ian salsagipao Eastern Nagaland-ni dambonga district-rango jekai, Mon, Kiphire, Tuensang, Noklak aro Longleng jolgimiko bang·a manderangni jegale jingjengatangani ja·man ong·skaaha, je jingjengatanion Mon district-oniko obostarang ong·anikoba knasona gita man·aha.

District-o jelbatgipa Konyak Naga tribe-ni chubatsranggipa dol, Konyak Union-ni chu·gimik champengataniko ong·atna gita agan-parakatani ja·man, district dambongao donggipa Naga jatni pal ong·e kamko ka·enggipa dolgippin Eastern Nagaland Peoples’ Union ba ENPO, uamangni dabianirangko knachakja dipet aro so·ota man·gipa ramram manderangna kakket bichalko on·kuja dipet chelchakgipa sipai dolrangni kosako bakrimjana gita ba “non-cooperation” -ko ong·atna gita parakatskaaha.