Shillong, Dec 6: Salgro salaram a•dokrango Armed Forces (Special Powers) Act (AFSPA)-ko ra•gatanichi maming namgnirangko ra•bana man•jaha aro batesa manderangna saknaanirangko ra•baaha ine Sombar salo, Meghalaya a•dokni Chief Minister aro National People’s Party (NPP)-ni national president Conrad K Sangma parakatenba, salgro salaram a•dokrangoniko ia niamko ra•galpilchina gita ma•mong sorkario dabiangaha.
“Indita bilsirangna salgro salaram a•dokrango Armed Forces (Special Powers) Act-ko ra•gatani a•sel manderang neng•nikanirangko man•na nangaha aro salgro salaram a•dokrango so•sojengjeng ong•anirangkosa nikna man•aiaha. Salgro salaram a•dokrango ia niamko ra•gatanichi manderang janggirangko gimaatna nangaha aro bang•a saknaanirang baksana duk mikchirangkoba chakna nangaha. Uni gimin ia jolrango dingtang dingtang neng•nikanirang donggenchimoba ia neng•nikanirangko namatna gita dingtang cholrang donggen ine nike chinga ia AFSPA-ko chu•gimik ra•galsrangchina dabienga,” ine Sangma parakataha.
Salgro salaram a•dokrango AFSPA-ko ra•gatani a•sel manderang neng•nikanirangko chagrongna nangtokengani gimin skangonin PA Sangma aro gipin dilgiparangba ia niamko ra•galpilchina dabiahachim ine janapatengon, AFSPA-ko ra•galchina dabianiara salsa salgnini gisepo ja•ku de•ani ong•ja indiba skangonin ja•ku de•giminsa ong•a ine a•dokni Chief Minister parakataha.
Salgro salaram a•dokrango chagrongna nangenggipa dingtang dingtang neng•nikanirangko ma•sina gitade name ning•tue nigenchimosa nambate ma•sina man•gen ineba Sangma parakataha.
Salgro salaram a•dokrango bobil dake chakataniko bon•atna gitade AFSPA-ko donangkuna nanggen ine mitam dolrang nangnikengoba uamang iako raken jegalenga ineba Sangma parakataha.
