Tura, Feb 28: All Garo Hills SSA School Teachers’ Association (AGHSSASTA)ni ru·uta somoirangna dabienggipa, 2016 aro 2017 bilsini Project Approval Boards (PAB)o on·gimin ja 8-ni arrear-rangko man·kujaengani gimin chanchirimaniko dake Sombar saloni Sukrobar salona, chong·motan March 1 tarikoni March 5 tarikona kingking skulrango klasrangko ra·gija champenganggen ine parakataha.
“Chinga changni-chang, chingni man·gnigipa 2016 aro 2017 bilsini PAB-o on·gimin ja 8-ni arrear-rangko on·pachina memorandum-rangko aro mol·molani lekkarangko seeming chu·gimik daitoko ra·gipa bil gnanggiparangna on·ahachim, indiba da·alona kingkingan a·dok sorkari ua man·gnirangko chingna on·kujaenga” ine AGHSSATA-ni dilgiparang koborna u·iataha.
Batanggimin bilsi-brini somoirango changni-chang mol·molranirangko aro jingjengatanirangko dakangahaoba a·dok sorkari namrengaiaha aro knachakjaha, uni gimin Association ianpako SSA skigiparangni gisik nanggijaniko mesokskana aro skigiparangni namgnina rakbate ja·ku de·aniko dakangna gita salanti skulrango klas ra·anirangko champengatskagen ineba association mikrakataha.
