Shillong, Dec 2: Amlarem C&RD Block-o gital Integrated Block Complex-ko rikna gita Sukrobar salo, Meghalaya a•dokni Community & Rural Development (C&RD) Minister Hamletson Dohling-ni jakchi pangchakaniko songe on•angaha aro ia pangchakaniko songanio a•dokni Home Minister Lahkmen Rymbui aro gipinrangba dongpae bak ra•angaha.
Ia Integrated Block Complex-na pangchakaniko songe on•angani somoio a•dokni C&RD Minister, jinmana aganprakangengon, an•tangtangko on•kange kamrangko ka•engani gimin aro jolo songdongenggipa manderangni namgnina a•dok aro ma•mong sorkarini ra•gate on•gipa scheme-rangko name chu•sokate on•engani gimin Amlarem Block-ni officer-rangko aro gipin kam ka•giparangko mittelpilangaha.
Ia office nokko rikna gita sorkari, gong crore 2.77 tangkarangko chame on•aha aro kamrangko bakan a•bachenggnok ine talataniko on•angengon, ia office nokko namdapate rikanichi, manderangna aro mongsongbate songadam nokadamrango donggipa manderangna nambate kamrangko dangdike on•na man•gnok ine C&RD Minister parakataha.
Amlarem C&RD Block-ni ning•o dol 71 village organisation (VO) aro dol 590 self help group (SHG)-rang donga ine janapatengon, ia pilak dolrangan jolni namroro silroroanina on•giltokaha ine Dohling parakataha.
