Tura, Nov 23: Mingsa knaronggijagipa aro TV-rangosan an·ching nikrongaigipa obosta ong·aniko East Garo Hills a·jaoniko knasoani gitade, pagipaoniko tangka dabina an·tangko rimgittanganga ine tol·e Songsak Police station-o mamlako segatanio jak donggipa sakgittam manderangko dingtang dingtang biaprangoniko police rim·aha.
Iani bidingo Songsak police-ni koborna aganatani gitade, re·anggipa November 18 tariko mande gimaengani koborko Songsak police station-o man·sochengaha, uandake salgipino ua mandeko rim·gittangangaha ine koborko man·ani ja·man Deputy Superintendent of Police (DSP) aro uni team bakan sandiataniko dakna gita a·bachengataha.
Sandiatanio, North Garo Hills-oniko A·chik saksa aro gipin jat saksako rim·e uamango sing·sandiatanikon dakon, an·tangko rim·gittanganga ingipa mandean mongsonggipa dos dakgipa ong·a ine ma·sina man·aha jean ia pilak obostana skang uni ripengrang baksa gimikko tarisamsoe pagipaoniko tangka gong lak 25-ko dabina gita iandakgipa ong·gija kamko ka·ahachim.
Rim·a man·gipa manderangara, North Garo Hills a·jani ning·ogipa Bolbuma songoni bilsi 40 ong·gipa Te Babil Ch Marak, Goalpara, Krishnai PS-ni ning·o donggipa Beldarghat songoni bilsi 28 ong·gipa Te Siddul Ali aro mongsong dos dakgipa apsan song Krishnai-oni bilsi 23 ong·gipa Te Azad Ali ong·a. Te Azad Ali-ko Guwahati-chini re·baako Dudnoi thanao rim·soaha aro ja·mano uko Songsak PS-ona rim·baaha.
A·bachenge sandiataniko dakanio ma·sina man·ani gitade, mamlao gipin jak donggipa sakbri da·o kate dongenga. Indake ong·engon, mamlao dos donggiparangni kosako gital dake FIR-ko segataha aro uamangni kosako niamo pangchake kamko ka·angna gita sakgittamkon da·o Songsak police station-o donenga ineba koborko man·sodapaha.
