Tura, March 17: 2019 bilsionin Ganol Hydel project-o kam ka•giparang, an•tangtangni man•na nangenggipa tangka paisarangko man•kujaenga ine matnangenba, an•tangtangni man•gnirangko on•china dabie, All Garo Hills Electricians Association (AGHTEA)-ni membor-rang, March 16 tarikonin jingjengatna a•bachengataha.
AGHTEA-ni president Justin T Sangma-ni parakatani gitade, 2019 bilsionin Ganol Hydel project-o kam ka•giparangna, uamangni man•gnirangko on•kujaengani gimin chubata gadango donggipa official-rangna dingtangmancha seachiba u•iatahachim indiba official-rangni maming aganchakanirangko man•kujaengani gimin uamang jingjengataniko dakna draatako man•aha.
Ganol Hydel project-o kam ka•gipa manderangni man•na nanganirang da•o lak 20 batpilengaha ine janapatengon, ia project-o kam ka•gipa manderang, an•tangtangni man•na nangkuenggipa dormaharangko man•kujaengani a•selan dingtang dingtang neng•nikanirangko chagrongna nangtokengaha ine Sangma parakataha.
Indake ong•engon, kam ka•giparangna uamangni man•gnirangko on•jagenchimode mikkangchi hydel project-ni kamrangko dontongate jingjengatangskagen ineba AGHTEA-ni president, mikrakataniko on•angaha.
