Shillong, March 17: A·doko niam gri pekatgipa samrangko badingenganichi chasong damberangni janggi tanganiko nosto ka·engani gimin uandakgiparangko champengna gita nangrime kamko ka·engani a·sel East Khasi Hills a·jani Anti-Narcotics Task Force (ANTF) law enforcement agency-rang, a·dokni skotongoniko adita bang·a pekgipa samrangko sekan baksa iano jak donggipa sak 6 manderangko Bristibar salo Lower Lachumiere-oniko rim·aha.
Uamangoniko, ge 5 sabon donchakgipa bikoprango dongipa gram 77.02 mang ong·gipa heroin drug-rangko, gram 1.71 ong·gipa heroin ge 19 sam botolrangko, scooty bolsa, ge 6 mobile phone-rang aro tangka gong 1,26,500/–rangkoba man·aha.
Indake ong·engon, niam gri pekgipa samrangko badinganina uamangni kosako niam gita ja·kurangko de·atan baksa, iandakgipa kamo bak donggiparangkoba police-rang sandidapatenga.
