Guwahati, Aug 22: Batanggimin jarango, Assam a•doko Al Qaeda bobil dolna kam ka•enggipa manderangko aro ‘Jihadi’-rangko rim•na man•ahani gimin gipin biaprangoni re•baenggipa ‘Imam’ ba toromko dilgiparangna Assam sorkari, Standard Operating Procedure (SOP) ba niamrangko tariengaha ine Sombar salo, Assam a•dokni Chief Minister Himanta Biswa Sarma parakataha.
Assam Chief Minister-ni kobor ra•timgiparangna parakatani gitade, ia SOP ba niamni ning•o, badiaba biaprangoni ‘Imam’ ba skiprakgiparang uamangni Madrassa-rango donggipa olakkiram nokrangona re•baengon, manderangko police-rangna u•iatchina gita didianggen.
An•tangtangni olakkiram nokrango nikronggijagipa ‘Imam’ ba skiprakgiparangko nikgenchimode police-rangna u•iatchina gita Assam a•doko songdongenggipa manderangko aro mongsongbate Muslim toromni manderangko didiatengon, ia skiprakgiparangni bidingo police-rang tale am•sandianirangko dakgen ine Sarma parakataha.
Sarma-ni parakatani gitade, ia niamara joltangni ‘Imam’ ba skiprakgiparangnade maming nangchakeani dongskajawa.
‘Jihadi’-rangko Assam a•doko songdongenggipa Muslim manderangan rim•na dakchakenga ine talataniko on•angengon, a•paloni re•baenggipa ‘Imam’-rangko biming segatna gita Assam sorkari, dingtangmancha cholgugako tarienga ine Sarma parakataha.
Salgni skangmangmangsan ‘Jihadi’-o jak donganina sakgni ‘Imam’-rangko rim•aha ine janapatengon, rim•ako man•gipa mande sakgnioni saksade ia dolni mongsonggipa mandean ong•achim aro da•o ia dolni sakbonga manderangkoba rim•na sandiengkua ine Assam Chief Minister parakataha.
Re•anggipa bilsiosan sorkarini chalaienggipa dam 800 madrassa-rangko Assam sorkari chipe donatahachim ine nikna man•a.
Assam a•doko sorkarichi chalaienggipa pilak madrassa-rangkon chu•gimik bon•atsrangaha aro re•anggipa bilsini April 1 tariko iandakgipa madrassa-rangko ramram skul dakatskaahachim.
