Shillong, Nov 24: Batanggimin salo West Jaintia Hills a·jani Mukroh songo obosta ong·anichi mongsongbate Khasi Hills a·jao Assam-ni garirangko nosto ka·anichi obostarang namjabatna gita a·bachengahani gimino, Assam Petroleum Mazdoor Union tom·e chanchirimangenba, Assam-ni garirangna Meghalaya-o chu·gimik naljokaniko on·na gita Meghalaya sorkari ja·kurangko de·atkujana kingking Meghalaya-china petrol saldobaenggipa garirangko champengatna tik ka·anganiko Bristibar salo u·iataha.
Assam aro Meghalaya a·dok damgnini sima jolo Assam police-ni slai goanio a·dokoni gimik sakbonga manderangni janggi gimaahani ja·man, so·so-jengjeng ong·anirangba batrikrikskaenganiko nikna gita man·enga. Uandake, mija Butbar salo Meghalaya-oni song damsani manderang Assam-ni West Karbi Anglong district-oni forest office nokko nosto ka·a baksana wa·al so·chipaha ine knasona gita man·aha.
Unbaksana, a·dokni skotong Shillong-o aro Mukroh songo bolgni garirangko manderang wa·al so·chipaha ineba knasona gita man·aha. Iani gisepon, Assam-chini dobaenggipa garirangko Meghalaya-o chadrapsoani koborrangko man·ani ja·man, songsul a·dokchipakna re·baenggipa gari salgiparangko Assam Police rama tong·saon champenge watpilattokengaha. Indake ong·oba, mal-bostu salgipa garirangkode da·odipet champengata dongkujaengachim.
Iani bidingo Assam Police-ni aganatani gita, Khasi Hills a·jani manderang private garirang aro chonchona garirangko nisan ra·e chapdrapenga, iani a·selsa Union, Assam-ni garirangna naljokanirangko on·na gita Meghalaya sorkarini ja·kurangko de·atkuja dipetna Khasi aro Jaintia Hills a·jarangona petrol salgipa garirangko champengna tik ka·aha ine janapataha.
Indake ong·engon, iandakgipa koborrangko manderang knasoenba Shillong songjinmani dingtang dingtang petrol pump-rango garirangni bakroe riting dakanirangko nikna gita man·skaenga aro mitam petrol pump-rangode torangba bon·changpilaha ine koborko man·soaha. Iani gisepon, niam aro ge·etanirangko a·doko rakkija ong·ode, da·o ong·enggipa obostani bate namjabatrorognikoba niksona gita man·enga.
Minggipin, petrol aro diesel garirangko Assam-o champengna tik ka·anichi manderangni so·so-jengjeng ong·tokenganina aro petrol pump-rangoniko nangana batpile manderangni torangko bretokenganina, West Garo Hills a·jani Deputy Commissioner, Swapnil Tembe, Bristibar salo a·jani manderangko jajrengjachina gita mol·molangenba, a·jaona chu·onga gita petrol aro diesel torangko ra·bana gita a·dok sorkari kamko ka·enga aro ia pilakkon district adminintration aro police chu·gimik nirokatgen ineba manderangna ka·dongataniko on·atjolaha.
