Shillong, Apr 5: Drugs ba pekatgipa samrangkoba badiaba somoirangode Army-rangni garirangoba ra•ruraenga ine matnanganirangko man•ani ja•man Army-rangni garirangkoba nirikkichina gita Meghalaya High Court, ge•etaniko on•ahani gimin ia kamko ka•na gita sorkari, niamrangko name nichengenga ine Mongolbar salo, Meghalaya a•dokni Home Minister Lahkmen Rymbui parakataha.
Rymbui-ni parakatani gitade, High Court-ni ge•etaniko man•soani ja•man ia kamko ka•na gita ua Chief Minister baksa niamrangko name poraie nichengenga.
“Da•o dipet iani bidingo aganchakna gita somoirang melikujaenga indiba a•doko iandakgipa obostarangko chinga ong•atna sikja. A•doko drugs jakkalaniko bon•ataniara sorkarini daitoan ong•a,” ine Rymbui aganaha.
Army-rangni garirango pekatgipa samrangko ra•ruraenga ine da•o dipet sorkaride maming kobor man•soa dongkuja indiba High Court-ni ge•etaniko man•ahani gimin niamrangko ja•rikaniara sorkarini kam ong•a ineba Home Minister aganaha.
Drugs ba uandakgipa maiba ong•gija bosturangko salruraenga ine nikgenchimode ramram manderangni garirangkosan ong•aigija sorkarini garirangkoba rim•e nanga gita ja•kurangko de•gen ineba ua aganaha.
