Tura, July 19: Mongolbar salo, Meghalaya a•dokni Chief Minister Conrad K Sangma, a•dok sorkarini ra•gatgipa ‘Aspire Meghalaya’ program-ni chatro chatrirang baksa agangrikangaha.
Ia Aspire Meghalaya program-ara, Meghalaya a•doko chadamberangna namroro silroroaniko ra•bana gita dingtanganiko ra•baani ostro mingsa gita ong•engachim aro ian chadamberangko dingtang dingtang kamrango bak ong•atna, chadamberangni changa sapanirangko sandina, Youth Policy-o pangchake chadamberangna janggi tangani cholrangko mesoke on•na aro a•doko lekka porako on•anio dakchakanirangko on•enggipa gita ong•engachim.
Ia program-ko ong•atanio a•dokni Chief Minister, Aspire Meghalaya-ni chatro chatrirang baksa agangrikengon, an•tangtangni kamrangko kakket aro bebeo ka•china didianiko on•angaha. Dingtang dingtang program-rangchi Meghalaya sorkari, chadamberangni changa sapanirangko mesokna cholrangko on•angkugen ineba ua aganaha.
Aspire Meghalaya 2.0.-ko chalaina gita Meghalaya sorkarini ning•o donggipa Sports & Youth Affairs Department, chu•gimik tangka paisarangko dakchake on•enga aro Meghalaya Youth Survey 2022-chi sak 60,000-na baten chadamberangko bak ong•ate sak 10,000-na baten chadamberangko, Soft Skills, Life Skills aro Career Preparedness Training-o namdapatna ka•dongenga.
West Garo Hills a•jao, Aspire Meghalaya program-ko da•o dipet Tura Government College, Garobadha-ni St Dominic Higher Secondary School, Tura Sacred Heart HS School, Tura Government HS School aro Dalu Higher Secondary School-rango chalaienga.
Ia program-ko ong•atanio chatro chatrirangba, an•tangtangni skie ra•ani aro changa sapanirangko mesokangan baksana ia program-ko a•bachengatanichi chadamberangna nambata cholrangko on•engani gimin sorkariko mittelpilangtokaha.
