Guwahati, August 4: Assam a·dokni skotong Minister Himanta Biswa Sarma, dam bonga a·tiprangni Bangladesh-o Ansarul Islam-ni dilenggipa bobil dol baksa nangrimaniko nike Assam a·dokkoba uamang Jihadirangni a·tip dakna miksongenga ine August 4 tarik-o aganaha.
Ia bilsini March jao Bangladesh-oni sak 6 bobil dolni manderang Assam-ona napbae chadamberango uamango bak man·atna kam ka·engmitingo saksakode Barpeta-o rim·na man·ahachim. Uamang Islam toromni bidingo skichenga dake ja·manode bobil dol dake ong·katna tarienggipasachim ine Himanta aganaha.
Bilsi 2016-17-rangoni uamang a·dokona niamgri napsrukbae sajinmani somoiorangoba a·tip dake chadamberangna skie on·anirangko dakahachim. Da·o dipet saksakosan rim·na man·kuaienga, unigimin a·doko songdonggipa saoba gipin a·songoni skigiparang dake napbagiparang dongengode Police dolna ui·atchinaba Sarma songdonggiparangma ui·ataniko on·jolaha.
