Shillong, May 18: Mongolbar salo, Meghalaya a•dokni Chief Minister Conrad K Sangma, internet gita Assam a•dokni Chief Minister Himanta Biswa Sarma baksa agangrikangaha aro COVID-ko a•dok damgni nangrime warachakna gita ku•rachakgrikangaha.
India a•song gimikon Coronavirus-ni giproroaniko warachakna ku•cholsan ong•e kamko ka•engon, Assam aro Meghalaya a•dokba ia sabisini giproroaniko apsan nangrime warachakna gita tik ka•angaha.
Meghalaya a•doko nangenggipa oxygen-rangko on•e dakchakna gita ku•rachakahani gimin Conrad, dingtangmancha ia tom•anio Assam sorkariko mittelpilangaha.
Mikkangchiba COVID-19-ni giproroanichi Meghalaya a•doko pilak nanganirangko dakchakangkuchina gita Conrad, Assam sorkariko didiataha aro Assam-ni Chief Minister-ba Meghalaya sorkarina pilak nanga dakchakanirangko on•na ku•rachakangskaaha.
Meghalaya a•dokona manderangni nangchongmotgipa bosturangko salbaenggipa Assam-ni garirang maming neng•nikanirangko man•jachina gita Assam-ni chief minister didiatahani gimin, lockdown-ni somoirango Assam-oni bosturangko salbaenggipa garirang maming neng•nikani grian re•rurana man•aigen ine Conrad ku•rachakaniko on•atskaaha.
“Assam sorkari, pong 100 Covaxin tikarang baksana D Type Cylinder-rangko Meghalaya a•dokna on•atgen,” ine Conrad parakataha.
Indake ong•engon, salgro salaram a•dokrangna Assam a•doko oxygen-ko chimongchake sualatna Assam sorkari, ma•mong sorkarina proposal-ko on•atmanahani gimin Meghalaya sorkarikoba ia mol•molanio bakrimchina gita Assam-ni Chief Minister didiataha.
