Shillong, July 23: Assam aro Meghalaya a·dokni simarango meligrikna man·gijagipa kamrangni bidingo Sukrobar salo, ia a·dok damgnini Chief Minister-rang skanggipa changna, Shillong-o agangrikaha.
A·dok damgnini gisepo meligrikgijanirangko namatenba, mikkangchi a·dok damgni meli-nangrime dongangna gitaba ia tom·anio Chief Minister sakgnian ku·rachakgrikangaha.
Assam a·dokni Chief Minister Himanta Biswa Sarma-ni aganani gitade, Assam a·dokni simarango donggipa dam 12 biaprango meligrikna man·jaenga ine Meghalaya a·dok a·kangahani gimin mikkangchi ia meligrikgijanirangko namatna gita ta·raken a·dok damgnini gisepo agangriktaigen.
A·dok damgnini chief minister-rang, re·baenggipa August-ni 6 tariko gnigipa changna Guwahati-o tom·e agangrikskagen ineba Sarma parakataha.
Indake ong·engon, a·dok damgnini gisepo agangrikani chu·sokgipa ong·aha ine Sarma parakatenba, mikkangchi a·dok damgnian ia meligrikgijaniko namatna gita mongsonggipa daito gita ra·gen ine talatangaha.
