Shillong, July 23: Assam aro Meghalaya a·dokni simarango meligrikgijaniko chief minister-ni gadango agangrikna Assam a·dokni Chief Minister Himanta Biswa Sarma-ni Shillong-ona re·baaniara a·dok damgnini gisepo meli-nangrimaniko bilakbatatani gita ong·gen ine Sukrobar salo Meghalaya a·dokni Chief Minister Conrad K Sangma, mittelpilaniko parakataha.
Sangma-ni aganani gitade, a·dok damgnini gisepo meligrikgijanirangko namatna gita indita somoirangko ra·chae dongahani a·selsa a·dok damgnini simarango meligrikgijanirangko aro so·sojengjeng ong·anirangkoba nikna nangahachim. Ia meligrikgijaniko namatna gita Assam-ni Chief Minister, an·tangni gisik nanganiko mesokaha aro mikkangchi a·dok damgnian ia meligrikgijaniko namatna gita ku·rachakgrikaha ineba Sangma parakataha.
A·dok damgnini simarango meligrikgijanirangko bakande namatna man·jawa aro baditaba chang gronge agangrikna nanggen ineba Meghalaya Chief Minister aganaha.
Ia meligrikgijaniko namatna gita joltango ong·enggipa obostarangko, itihasrangko aro kakketko see rakkianirangkoba nipiltaichengesa ja·kuko de·chakatna nanggen ineba Sangma parakataha.
Mikkang jao gnigipa changna a·dok damgnini chief minister-rang Guwahati-o gronge agangriktaina siengani gimin, ia tom·anio kakketko see rakkianirangkoba nipiltaie agangrikanggen ineba Meghalaya Chief Minister parakataha.
Sangma-ni parakatani gitade, Assam aro Meghalaya-ni simarango meligrikgijanirangko namatenba a·dok damgnini gisepo meli nangrime donganiko Union Home Minister Amit Shah-ba nangnikenga.
