Aizawl, Aug 5: Assam aro Mizoram a•dokni simarango tom•tomaniko rakkiangna aro India sorkarini on•gipa sipai dolrangko donna ku•rachakgrikangaha.
Re•anggipa July-ni 26 tariko Assam aro Mizoram a•dok damgnini simarango dolgni sipairang dinggrikanichi Assam-ni sipai sak 6 siangenba, sak 45-na baten sipairang saknaanirangko man•na nangahani gimin Bristibar salo a•dok damgnini minister-rang, Aizawl-o tom•e chanchirimangenba, a•dok damgnini gisepo tom•tomaniko rakkiangna ku•rachakgrikaha.
Ia tom•anio Assam a•dokoni Border Protection & Development Minister Atul Bora, Urban Development aro Town & Country Planning Minister Ashok Singhal baksana Border Protection & Development-ni Commissioner & Secretary GD Tripathi bakko ra•angaha.
Mizoram sorkarioniba ia tom•anio Home Minister Lalchamliana aro Home Secretary Vanlalngaihsaka bakko ra•angskaaha.
