Shillong, Apr 12: Assam aro Meghalaya a·dokni simarango meligrikgijaniko namatna gita a·dok damgnini gisepo sualgrikgipa dam 23 songrangko da·o ong·enggipa Opposition dilgipa Mukul Sangma an·tangan, uni chief minister ong·engmiting somoio see on·ahachim ine Mongolbar salo, Meghalaya a·dokni Chief Minister Conrad K Sangma talataniko on·angenba, ia dam 23 songrangoni dam 21-kode Meghalaya sorkari ra·rikpilna man·aha ine parakataha.
Sangma-ni parakatani gitade, ia dam 23 songrangko 2011 bilsion gitcham Congress sorkarini somoion segatahachim aro iako da·o Opposition dolni dilgipa ong·enggipa Mukul Sangma an·tangan, ia report-ko tarianio bang·a somoirangko nangaha aro iako uamang an·tangtangan on·aha ine Assembly-oba parakmanahachim.
Ua somoio gitcham sorkari, so·sojengjeng ong·enggipa songrangona re·ange songni manderang baksa agangrikgenchim ong·ode da·o obostarang dingtang ong·engnaba gnangchim ineba Meghalaya CM parakataha.
Ua somoion sorkari gualanirangko dakmanaha aro ua somoio sorkarini pakwate on·giminko da·alo dingtangatchina dabianiara ong·na amgijani ong·engaha ineba Sangma parakataha.
“Ua somoio da·o ong·enggipa Opposition dolni dilgipa an·tangan chief minister ong·e iako nangnikahani gimin da·alo uni iako ra·chakna man·gijaniara namen ong·srangjaenga,” ine Sangma aganaha.
2011 bilsio tarigimin map aro report-o pangchake, dam 23 songrangoni Malchapara aro Salbari songrangko Meghalaya-o man·chapbajaengaha aro ia jolni manderangan da·o iako dingtangatchina dabitokengachim ineba Chief Minister parakataha.
