Shillong, Dec 22: Assam aro Meghalaya a·dokni simarango meligrikna man·jaenggipa biaprangoni mitam biaprangkode re·baenggipa January 15 tarikni gisepon namatna ka·dongenga ine Budbar salo, Meghalaya a·dokni Deputy Chief Minister Prestone Tynsong parakataha.
Budbar salo Assam a·dokni Chief Minister Himanta Biswa Sarma aro Meghalaya a·dokni Chief Minister Conrad K Sangma, Guwahati songjinmani State Guest House-o gronggrike iani bidingo chanchirimangaha aro uamang baksa Meghalaya a·dokni regional committee chairman aro Deputy Chief Minister Prestone Tynsong-ba dongpaaha.
Chief Minister-rangni tom·a matchotani ja·man kobor ra·timgipa manderang baksa agangrikengon, ia tom·ani chu·sokgipa ong·aha maina chief minister sakgnian, a·dok damgnini simarango meligrikna man·jaenggipa biaprangoni mitamkode January 15 tarikni gisepon namatna tik ka·angaha ine Tynsong parakataha.
“Da·alo chief minister sakgnini tom·e chanchirimani namen chu·sokgipa ong·aha maina a·dok damgnini simarango meligrikna man·jaenggipa mitam biaprangkode chinga January 15 ba una skangan namatna man·gen ine ka·dongenga. January 15 tariko ba una skangba chinga changgni changgittamrang apsan tom·e chanchirimtainaba gnang,” ine Tynsong aganaha.
A·dok damgnini regional committee-rangan December 31 tarikni gisepode report-rangko a·doktangtangni chief minister-rangna on·gnok ineba Tynsong parakataha.
Assam aro Meghalaya a·dokni simarango meligrikna man·jaenggipa gimik dam 12 biaprang gnang aro ia dam 12-oni dam 6-ko skanggipa bako namatchengna gita a·dok damgnini sorkarirang ja·ku de·engahachim.
