Shillong, Sept 17: Assam aro Meghalaya a•dokni simarango meligrikna man•jaengani a•sel a•dokni dingtang dingtang biaprango so•sojengjeng ong•anirangko nikna man•engani gimin Assembly-o chanchirimanina aganchakaniko on•angengon, ia meligrikgijanirangko namatna gita dingtang dingtang cholrangko nina nanggen ine Meghalaya a•dokni Chief Minister Conrad K Sangma parakataha.
Chief Minister-ni aganani gitade, a•dok damgnini simarango meligrikgijaniko namatna gita a•dok damgnini itihasrangko aro see rakkianirangkoba nina nanggen.
A•dok damgnini itihasrang aro a•ani bidingo see rakkianirangna agreba, a•doko songdongenggipa dingtang dingtang jatrangni aro manderangni nangnikanirangkoba ia kamo ra•na nanggen ineba Chief Minister aganaha.
A•dok damgnini simarango meligrikgijanirangko man•gope kan•dike talatangengon, gitcham Meghalaya United Alliance (MUA) sorkarini see rakkigimin ki•tap, jekon ia sorkariba ja•rikengachim, uani bidingo Sangma janapjolangaha.
A•jatangko a•kangna gita lekkarang aro a•ani bidingo see rakkianirangara namen nangchongmotgipa ong•a ine janapatengon, a•dok damgnian ia biaprangko a•kangna gita nangchongmotgipa lekkarang dongskagenchimode iarangba sakkiko on•anio bilgri ong•aia ine Chief Minister parakataha. Iandakgipa obostaode a•dok damgnian meligrike namgrikna man•on nambata, ong•jaode kachariona re•ange dakchakaniko ra•anian chol ong•aigen ine Sangma aganaha.
Je biaprangkon Meghalaya a•dokni ine chanmanahachim, uandakgipa biaprangko Assam-na pakwate on•ani dongjawa indiba je biaprangkon a•dok damgnini gisepo songgigrikna nanggen, uarangni giminde Assam baksa agangrikgen ineba Chief Minister talataniko on•angaha.
