Shillong, Sep 14: Budbar salo, Assembly-ni Autumn Session-o Assam aro Meghalaya simani bidingo North Shillong-ni MLA Adelbert Nongrum baksana a·dokni Chief Minister Conrad K Sangma aro Deputy Chief Minister Prestone Tynsong-ni gisepo adita ding·chaogrike jera ra·aniko nikangna gita man·aha.
Assam sorkari baksa Memorandum of Understanding (MoU)-o soi ka·grikani gimin North Shillong-ni MLA Adelbert Nongrum, a·dokni Chief Minister Conrad K Sangma-ko matnangenba, ia MoU-ko nipiltaichina gita sorkariko ra·bion, Sangma-ba uni ra·bianiko ra·chakskae, lekkaniko nigija a·dok damgnini gisepo meligrikna man·jaenggipa dam 12 songrangko minge on·china aro ia meligrikna man·jaenggipa biaprangona ua badita chang re·ange nieaha, uko talatskachina aganskaaha.
Chief Minister-ni ia kattarangko aganchakon, North Shillong-ni KHNAM MLA, rang·san ka·a ding·chaoe, ian Chief Minister-ni daitosa ong·ani gimin ua uni agana gita dakjawa ine aganskaaha.
Iani ja·mano, deputy chief minister Prestone Tynsong-ba chief minister-na chake, nanganirangkosa sing·china aro ka·a nange mesokjachina North Shillong MLA-ko aganaha.
Uandakmiting somoio Assembly Speaker, uamang sakgittamko ka·sinatna jotton ka·ahachim indiba membor sakgittamni ku·rangan gam·bataiaha.
Sakgittam membor-rang minute-gnimangna ding·chaogrike jera ra·angkuaha indiba uamangko jripatna man·ahaon, Assembly-ni Speaker, North Shillong MLA-ni sing·anina aganchakchina gita Chief Minister-na somoiko on·aha.
“Ia obostani bidingo an·ching pilakan suk ong·ja aro anga uni suk ong·gijanikoba ma·sichaka. Indiba an·ching bang·batan ia biaprangni gimin name ma·sichenggijasa an·tangtangni chanchianirangko agantokenga. Uni giminsa ia biaprangni gimin talatchina anga uko aganahachim. Da·o election sokbaengahani gimin chrikaiode ba dakmesokaiode ong·jawa,” ine Chief Minister Conrad Sangma aganaha.
