Shillong, Jan 12: Budbar salo brigipa changna Meghalaya aro Assam a•dokni chief minister-rang, a•dok damgnini simarango meligrikna man•jaenggipa biaprangko namatna gita apsan asonge chanchirimangaha.
Ia tom•anio Meghalaya a•dokni Chief Minister Conrad K Sangma baksana a•dokni Deputy Chief Minister Prestone Tynsong aro gipin sorkari official-rangba dongpae bak ra•angtokaha.
Tom•a matchotani ja•mano Meghalaya a•dokni Deputy Chief Minister Prestone Tynsong, kobor ra•timgiparangna talataniko on•angengon, da•alo chief minister sakgnini tom•ani namen chu•sokgipa ong•aha aro a•dok damgnini simarango meligrikna man•jaenggipa biaprangko namatna gita a•dok damgnini sorkarirangan gisiko nange kam ka•engani gimin bakan iani bidingo a•dok damgnini manderangnaba u•iatna man•gnok ine parakataha.
“A•dok damgnini simarango meligrikna man•jaenggipa biaprangni bidingo chu•gimik report-ko on•china da•o chief minister sakgnian, an•tangtangni sorkarirangna ge•etaniko on•aha. Iani ja•mano a•dok damgnini chief minister-rang changsa tom•taienba uni ja•man Union Home Minister baksa tom•e chanchirimanggen. Kamrang da•o ka•sine matchotangengahani gimin January-ni 20 ba 21 tarikode bon•kamgipa report-ko a•dok damgnini manderangnan mesokna gita chinga ka•dongengaha,” ine Tynsong aganaha.
Meghalaya Dy CM-ni parakatani gitade, Budbar salo a•dok damgnini CM-rang, meligrikna man•jaenggipa damdok biaprangni gimin chanchirimangaha aro a•dok damgnini report-rangko man•tokahaon chief minister-rang tom•taie ja•kuko de•anggnok.
Re•baenggipa January-ni 21 tariko Meghalaya a•dokni bilsi 50 gapaniko manina siengani gimin iana skangan a•dok damgnini chief minister-rang, ja•kurangko de•na ka•dongsoenga ineba Tynsong parakataha.
