Shillong, Mar 14: Assam aro Meghalaya a•dokni simarango meligrikna man•jaenggipa dam 12 biaprangoni damdok jolrangko namatna gita dolgni sorkarirangni soi ka•grikgipa Memorandum of Understanding (MoU)-ko nipiltaichina gita Sombar salo, Khasi Hills Autonomous District Council (KHADC) didiangaha.

Sombar salo, KHADC-ni chief executive membor (CEM) Titos Chyne, iani bidingo Hima Mylliem, Jirang, Nongspung, Jyrngam aro Hima Nonglang-ni dilgiparangko okamenba apsan chanchirimangaha.

Tom•a matchotani ja•mano kobor ra•timgiparangna talataniko on•angengon, Assembly-o Chief Minister-ni parakatgipa mitam biaprangni bidingo ia jolni dilgiparang, suk ong•nikjaenba Assam-o napatna tik ka•gimin mitam songrangni gimin chanchipiltaichina didiangaha ine KHADC-ni CEM parakataha.

Iani bidingo KHADC-ni gita a•dok sorkarina sedoatenba, dolgni sorkarirangni soi ka•grikgimin MoU-ko nipiltaichina didianggen ineba Chyne parakataha.