Tura, March 1: Assam a•doko songdongenggipa A•chikrang, ru•uta bilsirangonin Garo Autonomous Council (GAC)-kosa dabienga ine parakatenba, Assam sorkarini on•enggipa Garo Development Council (GDC)-ko ra•na jechakangtokaha.
A•chik Socialist Youth Front of India (ASYFI) dolni u•iatani gitade, iani bidingo chanchirimtaina gita re•anggipa Sonibar salo United Garo Autonomous Council Movement Committee (UGACMC), jinma tom•bimonganiko Goalpara a•jani Kasumari Baida songo ong•atangaha aro ia tom•anio Assam a•doko songdongenggipa bang•bea A•chikrang bakko ra•angtokenba, Assam sorkarini on•enggipa GDC-ko ra•chakna gita jegalgrimtokaha.
ASYFI-ko dilenggipa manderangni u•iatani gitade, UGACMC-ni adita sak dilgiparangsa, Assam a•doko songdongenggipa A•chik jat baksa agangrikchenggija aro sing•cheng sanchenggija Assam sorkarini on•enggipa GDC-ko ra•chakahachim indiba iako Assam a•doko songdongenggipa A•chikrang gimikan jegalgrimtokskaaha.
Assam a•dokni Goalpara aro Kamrup a•jarango songdongenggipa A•chikrang, Rabha Hasong Autonomous Council (RHAC)-ni ning•osa dongna nangengkuani a•sel mamingni gitan tang•dopana man•jaengani gimin 2003 bilsio Scheduled Tribe (ST) gadangko man•chengaonin Assam a•doko songdongenggipa A•chikrangnaba, dingtang Garo Autonomous Council (GAC)-ko songe on•china gita Assam sorkari aro ma•mong sorkario dabiengahachim.
Assam a•doko songdongenggipa Koch-Rajbongshi, Moran aro Matak jatrangna dingtang autonomous council-rangko songe on•na man•ahaode, Assam a•doko A•chikrangba jelbra jel•subatsranggipa jatrangoni jatsa ong•paengani gimin A•chikrangnaba GAC-ko songe on•na nangchongmotenga ine Assam a•doko songdongenggipa A•chikrang dabitokengachim.
