Guwahati, Dec 20: Ia bilsi March-April jani gisepo Assam assembly-na pu·onatgipao Raha assembly seat-na seokako man·gipa Assam Congress-ni sakgipin MLA Pa Sashi Kanta Das-ni Sombar salo a·dokni skotong minister Pa Himanta Biswa Sarma-ko grongangachi uni BJP dolo napanggnini gimin adita jangbingbanganiko knasona gita man·enga.
Iani bidingo Congress-ni MLA-ko saffron party-o napanggnini giminba BJP-oni saksa koborna u·iataha.
Sombar salo skotong minister-ko gronga ja·man Pa Das-ni aganani gitade, adita dingtang dingtang namroro-silroroatani kamrangni bidingo skotong minister ka·dongataniko on·aha.
“Congress-o uni dongmitingonin anga uko (Sarma-ko) namen ma·sia jean saksa dilgipa ong·na sapgipa mandeba ong·a,” ine Congress MLA parakataha.
“A·dokni skotong minister-ko grongaiana anga BJP dolo napanggen ong·ja. Angni constituency-na dingtang dingtang namroro-silroroatani kamrangni bidingo nangchapesa anga uko grongaha,” ineba MLA aganangkuaha.
“A·songni PM Pa Narendra Modi-ni a·songko namroro-silroroatna gita niksamsoa dongani gimin gisiko didianiko man·enba, Raha-ni INC-ni MLA Pa Sashi Kanta Das, political-ni gita Assam sorkarina chakpaaniko on·na gita ku·rachakaha. Ian namgipa kam ong·a aro a·dokko sason ka·anikoba mangrakdapatgen. Anga aro Assam BJP-ni padot Pa Bhabesh Kalita, uni chanchie daka kamko bilongen namnikaha,” ine skotong minister Twitter-o see parakataha.
Moved by PM Sri @narendramodi‘s vision of development, Hon MLA of Raha of @INCIndia Sri Sashi Kanta Das has pledged his commitment to support Assam Govt politically. This is exemplary and will strengthen governance. I & BJP Assam President @Bhabesh_KalitaR hail this decision. pic.twitter.com/IqrxCLp8jG
— Himanta Biswa Sarma (@himantabiswa) December 20, 2021
Adita jarangna skang mangmang, sakgni Congress MLA — Mariani assembly seat-o chegipa Pa Rupjyoti Kurmi aro Thowra seat-o chegipa Pa Sushanta Borgohain-maang baksana All India United Democratic Front’s (AIUDF)ni sakgipin MLA Pa Phanidhar Talukdar jean Bhabanipur seat-o chegipa ong·a, uamang sakgittaman assembly memboroni kamtangko watani ja·man BJP dolo napangtokahachim.
